Aðventuferðir eldri borgara til Kaupmannahafnar hafa verið geysi vinsælar og undanfarin ár hefur verið uppselt í allar ferðirnar sem í boði voru. Ferðirnar eru frá sunnudagsmorgni til miðvikudagskvölds og brottfarir verða 21. nóvember, 28. nóvember og 5. desember. Dvalið er á hinu glæsilega hóteli Skt. Petri (Nánar um hótelið) í miðborg Kaupmannahafnar þaðan sem stutt er á Strikið, í verlsanir eða á veitingastaði.

Dagskrá ferðanna er tekur mið af þörfum eldra fólks og er bæði menningarleg, fræðandi og skemmtileg. Farið er í gönguferð um gamla bæinn undir íslenskri leiðsögn og einnig er heimsókn í Jónshús þar sem staðarhaldari tekur á móti hópnum og fræðir um sögu þessa merka húss. Þá er farið í skemmtisiglingu á lokadegi þar sem jazzbandið Scandinavian Rythmboys leikur skemmtilega tónlist meðan siglt er um síkin og borgin skoðuð frá öðru sjónarhorni. Boðið er uppá kvöldverð á komudegi þar sem ekta danskur matur er í boði og einnig á lokakvöldi þegar snæddur er „julefrokost“ á veitingastaðnum Grøften í Tivoli.